XISOMISANA

Tsalwa ra XISOMISANA ri hi paluxela hi nhwana loyi a nga kurisiwa hi kokwa wa yena N’wa-Bvuma endzhaku ko lova ka vatswari va yena. U kurile a ri karhi a risa timbuti na vafana lava vona a va ri vakulu eka yena. A tikuma a ri karhi a hlupheka ni ku va a endla xin’wana na xin’wana lexi a xi endla hi vafana emananga. Siku rin’wana u kume munhu loyi a tikomba a twa ku vava, kutani a fika ekaya a byela kokwa wa yena. Va vuye va ya n’wi teka kutani a ongoriwaku ku kondza a hola. Makwavo wa yena Yingwani a khomiwa hi mavabyi, kutani loko a fanele ku ongoriwa Moyasi a kombela ku famba na Xisomisana va lava loyi a nga ta n’wi tshungula. Loko va ri ku fambeni Moyasi a a xanisa Xisomisana a pfa a n’wi tsona swakudya. Va fambe nkarhi wo leha kambe a va helanga va kumile n’anga leyi a yi ta pfuna Yingwani. Xisomisana u hluphekile a pona ku dlawa laha a nga tikuma a pfuniwa hi vafundhisi loko a fanele ku dlawa. Va vuye va n’wi thya vito ra Paseka. Loko a ha ku amukela Xikwembu u suka a ya ka mati, kutani a hlangana na Yingwani.